Hazırda bəşəriyyətin təhlükəli asteroidlərin Yer kürəsi ilə toqquşmasının qarşısını almaq üçün effektiv üsulları yoxdur. Bununla belə, alimlər iri kosmik cisimlərin Yerə yaxınlaşmasını əvvəlcədən müəyyənləşdirmək və mümkün təhlükələri proqnozlaşdırmaq üzərində işləyirlər.
Oxu.Az xəbər verir ki, bu barədə Rusiya Elmlər Akademiyasının Kosmik Tədqiqatlar İnstitutunun (İKİ) elmi rəhbəri Lev Zelenıy "RİA Novosti"yə açıqlamasında bildirib.
"İri asteroidlərə o qədər də tez-tez rast gəlinmir. Buna görə də həmkarlarımız onların Yerə yaxınlaşmasını əvvəlcədən proqnozlaşdırmaq və həmin cisimləri öyrənmək istəyirlər. Bu, düzgün yanaşmadır. Hələlik isə onlarla necə mübarizə aparacağımızı bilmirik", - deyə alim vurğulayıb.
Asteroidlər Günəş ətrafında dövr edən, kosmik miqyasda nisbətən kiçik hesab olunan cisimlərdir. Onların ölçüləri 30 metrdən başlayır.
Yerə yaxın asteroidlər Günəşə Yer orbitinin radiusunun 1.3 misli qədər və ya daha az məsafədə yaxınlaşan kosmik cisimlər hesab olunur. Potensial təhlükəli asteroidlər isə Yer orbitinə 7.5 milyon kilometrdən az məsafədə hərəkət edən cisimlərdir. Müqayisə üçün qeyd edək ki, Yerlə Ay arasındakı məsafə təxminən 300 min kilometrdir.
Diametri bir kilometrdən böyük olan asteroidlər ayrıca kateqoriyaya aid edilir. Belə bir cismin Yer kürəsi ilə toqquşması qlobal fəlakətə səbəb ola bilər.
