Çin Daşıyıcı Raket Texnologiyaları Akademiyasının (CALT) tədqiqatçıları Yer üçün təhlükə yarada biləcək nəhəng asteroidlərin zərərsizləşdirilməsi məqsədilə yeni ikimərhələli üsul təklif ediblər.
Oxu.Az xəbər verir ki, bu barədə "South China Morning Post" (SCMP) nəşri məlumat yayıb.
Təklif olunan konsepsiyaya əsasən, ilk mərhələdə metal mərmi vasitəsilə asteroidin səthində dərin krater yaradılır. Daha sonra həmin boşluğa kosmik gəmi ilə nüvə başlığı yerləşdirilir və idarə olunan partlayış həyata keçirilir.
"Space: Science & Technology" jurnalında dərc olunan hesabata görə, aparılan simulyasiyalar göstərib ki, 3 meqaton gücündə (Xirosimaya atılan atom bombasından təxminən 200 dəfə güclü) partlayış diametri 100 metr olan asteroidi tamamilə məhv etmək gücünə malikdir.
Araşdırma zamanı həmçinin müəyyən edilib ki, partlayıcının asteroidin səthindən 30 metr dərinlikdə yerləşdirilməsi səthə yaxın partlayışla müqayisədə trayektoriyanın dəyişdirilməsi effektini üç dəfədən çox artırır. Bu isə təklif olunan üsulu asteroidin hərəkət istiqamətini dəyişdirmək baxımından daha səmərəli edir.
Xatırladaq ki, bundan əvvəl NASA-nın naviqasiya mühəndisi Davide Farnokkianın rəhbərlik etdiyi tədqiqat zamanı təxminən 30 il ərzində Yerə yaxın asteroid kimi müşahidə olunan 1998 SH2 obyektinin əslində "qaranlıq kometa" olduğu müəyyənləşdirilmişdi.
Mütəxəssislərin sözlərinə görə, bu cür obyektlər xarici görünüşünə görə asteroidə bənzəsə də, davranış xüsusiyyətlərinə görə kometalara xas əlamətlər nümayiş etdirən hibrid kosmik cisimlərdir.
