Keniyada "Meta" şirkətinin 30 keçmiş kontent moderatoru psixoloji travma və istismara məruz qaldıqlarını iddia edərək ümumilikdə 3.6 milyard Keniya şillinqi (təxminən 28 milyon ABŞ dolları - red.) məbləğində kompensasiya tələb edib.
Oxu.Az xəbər verir ki, bu barədə "The Standard" qəzeti məlumat yayıb.
İddiaya əsasən, cavabdeh qismində ABŞ-nin "Meta" korporasiyası və "Facebook" platformasında kontentin moderasiyası üçün əməkdaşlar işə götürən Keniyanın "Samasource Kenya EPZ" autsorsinq şirkəti çıxış edir.
İddiaçılar bildiriblər ki, işlədikləri müddətdə hər gün qətllər, işgəncələr, seksual xarakterli zorakılıq, intihar və uşaqlara qarşı zorakılıqla bağlı materiallara baxmalı olublar. Onların sözlərinə görə, bu, posttravmatik stres pozuntusu, depressiya və digər psixi sağlamlıq problemlərinin yaranmasına səbəb olub.
Keçmiş əməkdaşlar şirkətləri kifayət qədər psixoloji dəstək göstərməməkdə, işçiləri təzyiq altında saxlamaqda, müəyyən edilmiş normanı yerinə yetirməyən və ya əmək şəraitinə etiraz edən şəxsləri işdən çıxarmaqda da ittiham ediblər.
Qeyd edək ki, "Facebook"un kontent moderasiyası mərkəzi 2019-cu ildə Nayrobidə fəaliyyətə başlayıb və Saxaradan cənubda yerləşən Afrika ölkələrinə xidmət göstərib. "Samasource" 2023-cü ildə "Meta" üçün kontent moderasiyasını dayandırdıqdan sonra təxminən 260 əməkdaş işsiz qalıb.
2024-cü ildə Keniyanın Apellyasiya Məhkəməsi "Meta"nın ölkədə rəsmi nümayəndəliyi olmasa da, əmək mübahisələri üzrə cavabdeh qismində çıxış edə biləcəyinə qərar verib. Şirkət isə daha əvvəl bildirmişdi ki, podratçılar moderatorlara psixoloji dəstək göstərməli və onlara sahə üzrə orta göstəricidən yüksək əməkhaqqı ödəməlidirlər.
