Keniyada əksəriyyəti uşaqlar olmaqla 191 nəfərin qətlində təqsirli bilinən "Good News International Church" ("Xoş Xəbərlər Beynəlxalq Kilsəsi") adlı apokaliptik təriqətin lideri Pol Makkenzi 200 il həbs cəzasına məhkum edilib.
Oxu.Az bildirir ki, bu barədə "Reuters" agentliyi məlumat yayıb.
Məlumata görə, hökm noyabrın 6-da Mombasa şəhər məhkəməsi tərəfindən çıxarılıb. İş üzrə təqsirləndirilən daha 20-dən çox şəxsə də hökm oxunub.
Məhkəmə işi Keniyanın cənub-şərqindəki Şakahola meşəsində təriqət üzvlərinin kütləvi ölümü ilə bağlıdır. Məhkəmə prosesində ittiham tərəfi 120-dən çox şahidin ifadəsinə əsaslanıb.
İstintaq müəyyən edib ki, "Good News International Church" təşkilatına rəhbərlik edən Pol Makkenzi təriqət üzvlərini "İsa ilə görüşmək" naminə qidadan və tibbi yardımdan imtina etməyə məcbur edib. Makkenzinin təsiri altında valideynlər də övladlarını ac qalmağa məcbur ediblər. Bu isə uşaqların ölümünə səbəb olub.
Şakahola meşəsindəki kütləvi məzarlıqlar 2023-cü ilin aprelində aşkar edilib. Ərazidə 400-dən çox insanın qalıqları tapılıb. Təqsirini qəbul etməyən Makkenzi həmin vaxt həbs olunub.
Qətllərlə yanaşı, ona qarşı terrorçuluq və ehtiyatsızlıqdan adam öldürmə ittihamları da irəli sürülüb.
