Cənubi Koreya polisi ölkədə hərbi vəziyyətin tətbiqi ilə bağlı ölkə Prezidenti Yun Sok Yol barəsində araşdırmalara başlayıb.
Oxu.Az xəbər verir ki, bu barədə "Agence France-Presse" hüquq-mühafizə orqanlarının nümayəndəsinə istinadən məlumat verib.
"Hazırda dövlət başçısına qarşı iş gedir", - deyə o bildirib.
Xatırladaq ki, dekabrın 3-ü axşam saatlarında Cənubi Koreya Prezidenti Yun Sok Yol ölkədə hərbi vəziyyət elan edib. O, parlamenti "dövlət əleyhinə fəaliyyətlərlə ölkəni iflic etməkdə" və Şimali Koreyaya rəğbət bəsləməkdə ittiham edib. Hərbi vəziyyətə görə, ölkədə siyasi fəaliyyət və etiraz aksiyaları qadağandır, media senzuraya məruz qalır.
Hərbi vəziyyətin elan edilməsi ilə bağlı texniki cəhətdən hələ də nüvə silahına malik Şimali Koreya ilə müharibədə olan Cənubi Koreyanın bütün hərbi hissələrinə fövqəladə vəziyyətə hazırlıqlarını gücləndirmək əmri verilib.
Bundan əlavə, hərbçilər Koreya Respublikası parlamentinə girişi bağlayıb və deputatların hərbi vəziyyətin ləğvi üçün səsvermələrinə mane olublar. Daha sonra deputatlar hərbi vəziyyətin ləğvinə səs verməyə nail ola biliblər.
İndi ölkə qanunvericiliyinə uyğun olaraq, Prezident Yun Sok Yol impiçment təhlükəsi altındadır. Cənubi Koreya prezidentinin səlahiyyətlərinə vaxtından əvvəl xitam verilməsi ilə səsvermənin Milli Assambleyada 6-7 dekabr tarixində baş tutması nəzərdə tutulur.
