Danimarkanın ən yaşlı sakini, 112 yaşlı Kirsten Şvalbenin İkinci Dünya müharibəsi illərində Danimarka Milli Sosialist Fəhlə Partiyasında (DNSAP) iki rəhbər vəzifə tutduğu məlum olub.
Oxu.Az xəbər verir ki, bu barədə ölkənin dövlət arxivinin sənədlərini araşdıran Danimarkanın "Frihedsbrevet" nəşri məlumat yayıb.
Məlumata görə, 1943-cü ilin avqustundan 1944-cü ilin iyulunadək Şvalbe partiyanın Holstebro şəhərindəki yerli şöbəsinə rəhbərlik edib. O, eyni zamanda partiyanın qadın qrupunun da rəhbəri olub. Qadının mərhum həyat yoldaşı da partiyada rəhbər vəzifə tutub.
Şvalbe əvvəllər nasist partiyasına üzv olduğunu təsdiqləsə də, bu addımı ərinin təkidi ilə atdığını iddia edib. Hazırda isə qadın bu barədə şərh verməkdən imtina edir. Ailəsi jurnalistləri Şvalbenin səhhətini nəzərə almağa çağırıb.
Bu yaxınlarda Danimarkada uzunömürlü qadının bioqrafiyasına həsr olunmuş kitab nəşr edilib. "Gyldendal" nəşriyyatından bildirilib ki, nə kitabın müəllifləri, nə də naşirlər onun keçmişinin bu hissəsindən xəbərdar olublar. Hazırda nəşrin gələcək taleyi ilə bağlı qərar verilir.
2026-cı ilin mayında Kirsten Şvalbe və onun 104 yaşlı qardaşı Bertel dünyanın ən yaşlı bacı-qardaş cütlüyü kimi dünya rekordu müəyyən ediblər.