Afrikada yayılan Ebola virusuna qarşı peyvəndin dünyada ilk klinik sınaqlarına başlanılıb.
Oxu.Az xəbər verir ki, bu barədə "Bloomberg" məlumat yayıb.
Yazıda bildirilir ki, testlərin ilkin mərhələsinə 50 sağlam böyük yaşlı şəxs cəlb olunacaq. Sınaq prosesində ekspertlər peyvəndin təhlükəsizlik səviyyəsini və iştirakçıların immun cavabını dəyərləndirəcəklər.
Hindistanın Qan Zərdabı İnstitutu preparatın uğurlu olacağı halda gələcək mərhələlər və təcili tətbiq ehtimalı üçün indidən 620 min dozaya yaxın sınaq vaksini istehsal edərək ehtiyat yaradıb. İlk mərhələ üçün isə 4 min doza dərman vasitəsi ayrılıb.
Məlumata əsasən, COVID-19 infeksiyasında olduğu kimi, Ebolanın Bundibugyo ştamına qarşı vaksin üçün də şimpanze adenovirusuna əsaslanan platformadan istifadə edilir.
Xəstəliklərə Nəzarət və Profilaktika üzrə Afrika Mərkəzlərinin baş direktoru Jan Kaseyanın sözlərinə görə, peyvənd effektiv nəticə göstərsə belə, onun Ebolanın hazırkı yayılma gedişatını dəyişdirməsi ehtimalı azdır. Bu preparat gələcək epidemiyalarla mübarizədə daha təsirli vasitələrin hazırlanması üçün lazımdır.
