Türkiyə Prezidenti Rəcəb Tayyib Ərdoğan NATO-ya üzv olan Avropa ölkələrinin alyans çərçivəsində daha çox məsuliyyət götürməsinin vacib olduğunu bildirib.
Oxu.Az TASS-a istinadən xəbər verir ki, o, bunu iyulun 7-8-də Ankarada keçiriləcək NATO sammiti ərəfəsində deyib.
"Ankarada keçiriləcək NATO sammiti çərçivəsində alyansın Avropa qanadının və onun çəkindirmə potensialının gücləndirilməsi ümumi prioritetimizdir. Biz trans-Atlantik əlaqələrin möhkəmləndirilməsini və avropalı müttəfiqlərin alyans çərçivəsində daha çox məsuliyyət götürməsini vacib hesab edirik", - Ərdoğan Ankarada polşalı həmkarı Karol Navrotski ilə danışıqların yekununda bildirib.
Daha əvvəl xəbər verilmişdi ki, Ankara sammitində NATO-ya üzv 32 ölkənin liderləri, eləcə də alyansa daxil olmayan bir sıra dövlətlərin rəhbərləri iştirak edəcəklər. Ümumilikdə tədbirə təxminən altı min nəfərin qatılması gözlənilir.
Sammitin təhlükəsizliyinin təmin olunmasına Türkiyənin güc strukturlarının 70 min əməkdaşı cəlb ediləcək. Türkiyənin hava hücumundan müdafiə sistemləri və Hərbi Hava Qüvvələri yüksək hazırlıq vəziyyətinə gətiriləcək. Ümumilikdə Ankarada pilotsuz uçuş aparatları və dron əleyhinə vasitələrdən istifadə edilməklə çoxsəviyyəli təhlükəsizlik sistemi qurulacaq.
Türkiyə bundan əvvəl 2004-cü ildə İstanbulda NATO sammitinə ev sahibliyi edib.
