Ermənistanda saxlanılan rusiyalı iş adamı Samvel Karapetyana qarşı növbəti ittiham irəli sürülüb.
Oxu.Az-ın TASS-a istinadən xəbərinə görə, bu barədə iş adamının mətbuat xidmətindən məlumat verilib.
Məlumata görə, erməni müstəntiqləri həbsdə olan rusiyalı biznesmeni konstitusiya quruluşunu devirməyə çağırışlarla yanaşı, çirkli pulların yuyulmasında da ittiham edib.
"Samvel Karapetyan bir neçə şirkətin fəaliyyəti nəticəsində çirkli pulların yuyulmasında ittiham olunub", - deyə Karapetyanın komandasının bəyanatında bildirilib.
Xatırladaq ki, "Taşir" şirkətlər qrupunun rəhbəri, rusiyalı milyarder Samvel Karapetyan Ermənistan Cinayət Məcəlləsinin 422-ci maddəsinin 2-ci hissəsi üzrə - hakimiyyətin ələ keçirilməsinə açıq çağırış, ərazi bütövlüyünün pozulması, suverenlikdən imtina və konstitusiya quruluşunun zorakılıqla devrilməsində ittiham olunub və iyunun 18-də iki ay müddətinə həbs edilib. Ermənistan mediasında yayılan məlumata görə, o, Ermənistan Milli Təhlükəsizlik Xidmətinin ("İrəvan-Kentron" cəzaçəkmə müəssisəsi) binasındakı məşhur "KQB zirzəmisi"ndə saxlanılır.
