Yanvarın 31-i yerli vaxtla saat 18:30-da (Bakı vaxtı ilə şənbə günü 03:30-da) Filadelfiyada (ABŞ) dəhşətli faciə baş verib. Tibbi təxliyə təyyarəsi olan "Learjet 55" şəhərin şimal-şərqindəki hava limanından qalxdıqdan qısa müddət sonra qəzaya uğrayıb. Təyyarədə dörd ekipaj üzvü, bir xəstə (uşaq) və bir müşayiətçi olmaqla altı nəfər olub. Onların hamısı həlak olub.
Oxu.Az-ın verdiyi məlumata görə, bu barədə CBS telekanalı məlumat yayıb.
Bildirilir ki, qəzaya uğrayan təyyarənin məxsus olduğu "Jet Rescue Air Ambulance" hava təcili yardım şirkəti hazırda sağ qalanların olduğunu təsdiqləyə bilmir.
Bəzi məlumatlara görə, yetkinlik yaşına çatmayan sərnişin ABŞ-də müalicədən sonra anası ilə birlikdə Meksikaya qayıdan qız olub.
Qəza "Roosevelt Mall" ticarət mərkəzinin yaxınlığında baş verib. Hadisə yerindən çəkilən videoda təyyarənin şığıyaraq yerə çırpıldığı və partladığı görünür.
Filadelfiya meri Şerell Parker bildirib ki, yerdə bir neçə ev və avtomobil od tutub, çoxlu yaralı var.
Ekspertlərin fikrincə, qəza zamanı güclü partlayışın səbəbi tibbi təyyarədəki oksigen balonlarının yanacaqla qarışması ola bilər.
Təyyarə Missuri ştatının Sprinqfild-Brenson şəhərinə uçurdu.
Qəzanın səbəbləri hələ məlum deyil, lakin media məlumatlarına görə, hava soyuq və yağışlı olub, görüntü məsafəsi pis olub. Hadisəni Federal Aviasiya İdarəsi və ABŞ-nin Nəqliyyat Təhlükəsizliyi üzrə Milli Şurası araşdırır.
Bu, son 24 saat ərzində ABŞ-də baş verən ikinci ardıcıl təyyarə qəzasıdır. Bir gün əvvəl Vaşinqton üzərində "Bombardier CRJ700" sərnişin təyyarəsi ilə "Sikorsky H-60" ("Black Hawk") hərbi helikopterinin toqquşması nəticəsində 67 nəfər həlak olub.
