Filippinin Palavan əyaləti sahillərində yanaraq külə dönən bərədən daha 30 nəfərin meyiti çıxarılıb.
Oxu.Az "Al Jazeera"ya istinadən xəbər verir ki, bununla da sentyabrın 9-da baş verən faciə nəticəsində ölənlərin sayı 35 nəfərə yüksəlib.
Bərə paytaxt Manila şəhərindən Palavana gedərkən alovlanıb. Gəmidə 130-dan çox sərnişin olub. Hazırda 54 nəfərin taleyi məlum deyil, 43 nəfər isə xilas edilib.
Xilasedicilər yüksək temperatur və güclü tüstü səbəbindən gəminin içərisinə daxil olmaqda çətinlik çəkiblər.
Qeyd olunub ki, yanmış meyit qalıqları gəminin ekonom sinif üçün nəzərdə tutulmuş hissəsində aşkarlanıb. Polis ekspertləri qalıqları çıxarmaq və onların kimliyini müəyyənləşdirmək üçün araşdırma aparırlar.
Filippinin Palavan əyalətinin sahillərində yanan "MV June Aster" sərnişin bərəsinin ekonom-klas hissəsində yanmış insan qalıqları aşkar edilib.
Oxu.Az xəbər verir ki, bu məlumatı Filippin Sahil Mühafizəsinin rəsmi təmsilçisi Noemi Kayabyab keçirilən brifinq zamanı açıqlayıb.
Gəmidə baş verən yanğın bu gün tamamilə söndürülüb. Kayabyabın sözlərinə görə, əraziyə cəlb olunan xilasedici qrup gəmidə ətraflı təhlükəsizlik yoxlaması həyata keçirib və məhz bu baxış zamanı qalıqlar aşkarlanıb.
O, faciə qurbanlarının ailələrinə dərin hüznlə başsağlığı verərək qeyd edib: "Hazırda Sahil Mühafizəsi, polis və digər aidiyyəti qurumlar tərəfindən həlak olan şəxslərin qalıqlarının çıxarılması və kimliyinin müəyyən edilməsi istiqamətində zəruri tədbirlər görülür".
Xatırladaq ki, Filippin Sahil Mühafizəsi sentyabrın 9-da Palavan əyalətinin sahil sularında sərnişin bərəsində yanğın baş verməsi barədə məlumat yaymışdı. Qurumun təqdim etdiyi məlumata əsasən, insident nəticəsində 5 nəfər həyatını itirib, 43 sərnişin xilas edilib, daha 84 nəfər isə itkin düşmüş hesab olunur.
