Filippinin Haaqa həbsxanasında olan keçmiş prezidenti mer seçkisində qalib gəldi

Filippinin keçmiş prezidenti Rodriqo Duterte insanlığa qarşı cinayətlərdə ittiham edilərək minlərlə mil uzaqlıqda - Haaqada həbsdə olsa da, Davao şəhərinin meri vəzifəsinə seçilib.

Oxu.Az xəbər verir ki, bu barədə "The Guardian" məlumat verib.

Seçki komissiyasının qeyri-rəsmi nəticələrinə görə, 80 yaşlı Duterte 60%-lik göstərici ilə 405 min səs toplayaraq rəqibi üzərində ciddi üstünlük əldə edib. Belə ki, o, 49 min səs toplayan ən yaxın rəqibini xeyli qabaqlayıb.

Narkotiklərin istifadəsi və ticarətinə qarşı apardığı mübarizə ilə tanınan Duterte mart ayında həbs olunaraq Haaqaya aparılıb. Dutertenin narkotiklərə qarşı kampaniyası ərzində minlərlə gənc küçələrdə güllələnərək öldürülüb.

Qətllərlə bağlı beynəlxalq ictimaiyyətin qəzəbinə baxmayaraq, sərt xarakteri ilə tanınan Duterte prezidentliyi boyu populyarlığını qoruyub saxlayıb.