Fransa hökuməti Pavel Durova ABŞ-yə səfər izni verməyib

Fransa hökuməti "Telegram" messencerinin qurucusu və baş direktoru Pavel Durova ABŞ-yə səfər icazəsi verməkdən imtina edib.

Oxu.Az-ın verdiyi məlumata görə, bu barədə "Politico" məlumat yayıb.

Bildirilir ki, Paris Prokurorluğu mayın 12-də səfər müraciətini rədd edib.

"Səfər zəruri və əsaslı hesab olunmur", - deyə rəsmilər qərarı şərh ediblər.

Durovun üzərinə Fransa məhkəməsi tərəfindən qoyulmuş mövcud məhdudiyyətlərə əsasən, o, səlahiyyətli orqanların xüsusi icazəsi olmadan ölkə ərazisini tərk etmək hüququna malik deyil. Qeyd edək ki, daha əvvəl Durova Dubaya səfər üçün müvəqqəti icazə (15 martdan 7 aprelədək) verilmişdi.