Fransanın meşə yanğınları ilə mübarizə aparmaq üçün istifadə etdiyi "Canadair" təyyarələrinin yaşı 19-32 il arasındadır.
Oxu.Az "The Wall Street Journal"a istinadən xəbər verir ki, mövcud vəziyyət dövlətin təbii fəlakətlərə qarşı müqavimət gücünü sual altında qoyur. Hazırda istifadədə olan 12 hava gəmisinin böyük bir qismi davamlı olaraq texniki baxışdan keçirilməlidir. Pilot Qreqori Prats bildirib ki, son kütləvi yanğınlar zamanı onlardan cəmi beşi tam işlək vəziyyətdə olub.
Müxalifəti təmsil edən deputatlar ölkə Prezidenti Emmanuel Makronu vaxtı keçmiş uçuş aparatlarını yeniləməməkdə ittiham ediblər. Nəşrin məqaləsində vurğulanır ki, "Canadair" hava gəmiləri məhz mürəkkəb yanğınsöndürmə əməliyyatları üçün istehsal edilsə də, zaman keçdikcə paslanmaya məruz qalır və daha ağır texniki bərpa işlərinə ehtiyac duyulur.
2022-ci ildə baş verən dağıdıcı yanğınlardan sonra E.Makron aviasiya parkını yenilənəcəyini və 2027-ci ilə qədər daha dörd təyyarə alacağını söz vermişdi. Buna baxmayaraq, ilk iki hava gəmisinin 2028-ci ildə, qalanlarının isə bundan dörd-beş il sonra təhvil verilməsi gözlənilir.
Xatırladaq ki, bir müddət öncə Fransa rəhbərliyinin Lej-Kap-Ferret yarımadasında yerləşən malikanələri xilas etmək üçün həmin zəngin bölgəyə xüsusi texnika yönəltdiyi, eyni vaxtda isə Le Port qəsəbəsində 200-ə yaxın fərdi evin külə döndüyü barədə məlumatlar yayılmış və bu da ciddi narazılıqlarla nəticələnmişdi.
Evlərini itirən vətəndaşlar hökuməti məsuliyyətsizlikdə ittiham edir və dəymiş ziyana görə təzminat almağı planlaşdırırlar. Bununla yanaşı, ekoloji böhran daha da kəskinləşir: bütün ölkə ərazisində qəsdən törədilən yanğın hadisələri çoxalıb və bu işlə bağlı 250-dən artıq şübhəli şəxs həbs edilib.
