Günəşdə tac dəliyi böyüməyə başlayıb.
Oxu.Az bildirir ki, bu barədə Rusiya Elmlər Akademiyası Kosmik Tədqiqatlar İnstitutunun Günəş Astronomiyası Laboratoriyasının "Telegram" kanalında məlumat verilib.
Məlumata görə, tac dəliyi bir neçə gündür ki, Günəşin Yer kürəsinə baxan tərəfində böyüyür.
Dəlik, xüsusilə, son 24 saatda sürətlə böyüyür: Sutka ərzində dəlik təxminən 50 faiz artıb.
Alimlər hesab edirlər ki, dəlik ərazisində xüsusilə sürətli və sıx günəş küləyinin axını mümkündür. Avqustun 19-20-də bu, 800-900 km/s-ə çata bilər ki, bu da normal göstəricilərdən iki yarım dəfə çoxdur.
Laboratoriya hesab edir ki, günəş küləyinin bu cür artması geomaqnit vəziyyətə təsir göstərə bilər. Eyni zamanda, yaxın günlərdə, o cümlədən həftəsonu Yerin maqnit sahəsi sakit qalacaq.
