Avqustun 25-də Günəşdə növbəti güclü partlayış olub.
Oxu.Az-ın TASS-a istinadən xəbərinə görə, bu barədə Rusiya Tətbiqi Geofizika İnstitutundan məlumat verilib.
"Avqustun 25-də Moskva vaxtı ilə saat 13:02-də (Bakı vaxtı ilə saat 14:02 - red.) rentgen diapazonunda 4513 (N03E05) Günəş ləkəsi qrupunda 41 dəqiqə davam edən M7.0 partlayışı qeydə alınıb", - deyə məlumatda bildirilib.
Bu partlayışdan əvvəl, avqustun 25-də eyni 4513 Günəş ləkəsi qrupunda daha üç M sinifli partlayış baş vermişdi.
Birincisi Moskva vaxtı ilə saat 04:26-da (Bakı vaxtı ilə saat 05:26 - red.) baş verib və M2.0 sinfi kimi təsnif edilib, ikincisi Moskva vaxtı ilə saat 07:02-də (Bakı vaxtı ilə saat 08:02 - red.) qeydə alınıb və M1.8 sinfinə çatıb. Üçüncü partlayış isə Moskva vaxtı ilə saat 09:40-da (Bakı vaxtı ilə saat 10:40 - red.) baş verib və həmçinin M1.8 sinfinə aid olub.
Günəşdə aktivlik kəskin şəkildə artıb, görünən Günəş diskinin mərkəzindəki əsas aktiv mərkəz üç M səviyyəli partlayış yaradıb. Yerə təsir riskləri son aylarda ən yüksək həddədir.
Oxu.Az xəbər verir ki, bu barədə Rusiya Elmlər Akademiyasının Kosmik Tədqiqatlar İnstitutunun Günəş Astronomiyası Laboratoriyası öz "Telegram" kanalında məlumat verib.
"Yerə doğru plazma atışları və bununla əlaqəli geomaqnit qasırğaları ilə bağlı birbaşa proqnozlar hələ ki, yoxdur (vəziyyət öyrənilir), lakin Yer kürəsi üçün risklər son aylarda ən yüksək həddə çatıb, çünki bu rakursdan onu nəzərdən qaçırmaq sadəcə olaraq mümkün deyil", - deyə məlumatda bildirilib.
Bakı vaxtı ilə təxminən gecə yarısından bəri Günəş aktivliyində sürətli artım müşahidə olunur. Görünən Günəş diskinin mərkəzində - Yerə birbaşa zərbələrin mümkün olacağı bölgədə Günəşdə 4513 nömrəli nəhəng mərkəz gözlənilmədən aktivləşib.
Müvafiq ləkələr qrupu Günəşdə təxminən bir həftədir müşahidə olunur, lakin son günlərdə məhdud aktivlik nümayiş etdirirdi. Mərkəz demək olar ki, öz enerjisini tükətmiş hesab edilirdi, lakin başlayan partlayışlar seriyası bu ehtimalı təkzib etdi.
Günün əvvəlindən bəri M səviyyəli 3 güclü partlayış qeydə alınıb ki, bu da beş ballıq şkala üzrə dördüncü kateqoriyadır. Onların gücü M1.7 ilə M1.9 arasında dəyişir. Bundan əvvəl bütün avqust ayında ancaq dörd belə hadisə baş verib, buna görə də onların sayı cəmi bir neçə saat ərzində demək olar ki, ikiqat artıb.
