Yaponiya hökuməti yerli universitetləri ABŞ-nin Harvard Universitetindən Tramp Administrasiyasının qərarı ilə yerdəyişmə etmək məcburiyyətində qalacaq əcnəbi tələbələri müvəqqəti qəbul etmək barədə düşünməyə çağırıb.
Oxu.Az-ın xəbərinə görə, bu barədə "Kyodo" agentliyi təhsil, mədəniyyət, idman, elm və texnologiyalar naziri Toşiko Abeyə istinadən məlumat verib.
"Biz müvafiq qurumlarla əməkdaşlıq etmək, ambisiyaları və istedadları olan gənclərin təhsil almaları üçün səy göstərmək istərdik", - deyə nazir bildirib.
Qeyd edək ki, mayın 26-da Tokio Universitetinin artıq bu imkanı nəzərdən keçirdiyi məlum olub.
Harvardda 110 yaponiyalı tələbə təhsil alır və Yaponiyadan 150 tədqiqatçı var.
Xatırladaq ki, Donald Tramp Administrasiyası Harvard Universitetinin digər ölkələrdən tələbə qəbuluna verilən icazəni dayandırıb. ABŞ daxili təhlükəsizlik naziri Kristi Noem bəyan edib ki, Harvard Universiteti kampusda zorakılıq və antisemitizmi təbliğ etdiyinə, həmçinin universitet administrasiyasının fəaliyyətlərinin Çin Kommunist Partiyası ilə koordinasiya edildiyi iddialarına görə beynəlxalq tələbələri qəbul etmək imkanından məhrum edilib. Qurumun saytında yer alan məlumatda qeyd edildiyi kimi, bu o deməkdir ki, hazırda təhsil alan əcnəbi tələbələr başqa təhsil müəssisələrinə köçürülməlidir.
Buna cavab olaraq Harvard Universiteti Boston federal məhkəməsində iddia qaldırıb.
