Hindistan rəhbərliyi ölkənin Hərbi Hava Qüvvələrini gücləndirmək məqsədilə 114 ədəd "Rafale" çoxməqsədli qırıcı təyyarənin tədarükü üçün Fransaya rəsmi sorğu göndərib.
Oxu.Az xəbər verir ki, bu barədə ANI agentliyi məlumat yayıb. Bildirilib ki, bu addım milli hərbi aviasiyanın ehtiyaclarını qarşılamağa yönəlib.
Təxminən 38.9 milyard dollar (3.23 trilyon rupi) dəyərində qiymətləndirilən bu potensial hökumətlərarası müqavilə üçün müraciət Fransa tərəfinə mayın 25-i və 31-i aralığında təqdim edilib. Çatdırılma şərtlərinin isə tərəflər arasında 2027-ci ildə tam razılaşdırılması planlaşdırılır.
Xatırladaq ki, bundan əvvəl Nyu-Dehli təcili satınalma proqramı çərçivəsində 36 ədəd eyni tipli döyüş təyyarəsinin alınması üçün müqavilələr imzalamışdı.
Hindistanın bu son müraciəti dövlətin köhnəlməkdə olan hərbi aviasiya parkının genişmiqyaslı modernləşdirilməsi strategiyasının vacib bir hissəsi hesab olunur. Bölgədə mövcud olan qeyri-sabit vəziyyət fonunda ölkə öz hərbi hava qüvvələrinin potensialını əhəmiyyətli dərəcədə artırmaq niyyətindədir.
