Hindistan polisi Kumta dairəsindəki Ramatirtha təpələri ərazisində yerləşən mağarada Rusiya vətəndaşı və iki azyaşlı uşağını tapıb.
Oxu.Az bildirir ki, bu barədə PTI agentliyi məlumat yayıb.
Hüquq-mühafizə orqanlarının məlumatına görə, Mohi təxəllüsü ilə tanınan 40 yaşlı rusiyalı Nina Kutina Hindistana iş vizası ilə gəlib. Qoadan o, sahilyanı Qokarna şəhərinə gedib. Oradan Kutina və övladları meşəlik Ramatirtha təpələrinə gediblər. Polisin məlumatına görə, o, burada iki həftəyə yaxın vaxt keçirib.
Onunla birlikdə uşaqları - altı yaşlı Preya və dörd yaşlı Ama da olub. Qadın və uşaqlar tapıldıqdan sonra onlar təhlükəsiz yerə aparılaraq tibbi müayinəyə göndəriliblər.
Ramatirtha təpələri Uttara-Kannada rayonunun Kumta şəhəri yaxınlığında yerləşir. Bu, ruhaniliyi axtaranlar və asketlər arasında məşhur olan seyrək məskunlaşmış və uzaq bir bölgədir.
Rus qadının daha əvvəl gəldiyi Qokarna induistlər üçün müqəddəs yer hesab olunur və bura dünyanın hər yerindən yoqa və meditasiya təcrübələrinin davamçıları gəlirlər.
