Hindistanın Maharaştra ştatında faciəli hadisə baş verib - 58 yaşlı Bhumita Haridos Pendam pələngin hücumuna məruz qalıb.
Oxu.Az-ın xəbərinə görə, bu barədə "Times of India" nəşri yazıb.
Məlumata görə, qadın Çadrapur rayonunun Mohbodi meşə massivində çiçək toplayarkən yırtıcı heyvan qəfil onun üstünə atılıb. Yaşayış məskəninin yaxınlıqda olmasına baxmayaraq, qadına kömək etmək mümkün olmayıb. Pələng onu yerindəcə parçalayıb.
Qeyd edək ki, Mohbodi meşəsi aqressiv Benqal pələngləri ilə məşhur olan Tadoba-Ankxari Vəhşi Təbiət Qoruğunun bufer zonasında yerləşir. Bu ilin əvvəlindən artıq bu ərazidə zolaqlı yırtıcıların insanlara 10 ölümcül hücumu qeydə alınıb. Ötən il 29 nəfər pələnglərin qurbanı olub.
Ştatın Meşə Departamenti yerli əhaliyə xəbərdarlıq edib və meşə massivlərinə ziyarət zamanı son dərəcə diqqətli olmağa çağırıb.
