Hindistanda quyuya düşən qızı bir həftəyə yaxındır xilas etməyə çalışırlar

Hindistanın şimal-qərbində yerləşən Racastan ştatında mədən quyusuna düşən qızı xilas etmək üçün xilasedicilər artıq bir həftəyə yaxındır səy göstərirlər.

Oxu.Az bu barədə "India Times" qəzetinə istinadən xəbər verir.

Məlumata görə, quyuya düşən üç yaşlı Çetnanın xilas edilməsi əməliyyatı artıq altıncı gündür davam edir. Qız 200 metrdən artıq dərinliyi olan quyunun 45 metrliyində qalıb. Çetna təxminən 130 saat qidasız qalıb və beş gündür hərəkət əlamətləri göstərmir.

Hazırda xilasetmə əməliyyatı yekun mərhələdədir. Mütəxəssislər 50 metrdən artıq dərinliyə qədər qazıntı işləri apara biliblər. Xilasedicilər Çetnanın olduğu quyuya doğru tunel formalaşdırmağa çalışırlar.