İran ətrafında yaranmış vəziyyət və Hörmüz boğazının blokadaya alınması riski Avropada dərman qıtlığına səbəb ola bilər.
Oxu.Az "La Tribune" nəşrinə istinadən xəbər verir ki, Avropa əczaçılıq sənayesi xammal tədarükündə 80% Çin və Hindistandan asılıdır. Həmin ölkələrin əczaçılıq sektoru isə neft və qaz qiymətlərindəki qeyri-sabitliyə görə çətinliklər yaşayır. Eyni zamanda, Asiya və Yaxın Şərqdə aviauçuşların ləngiməsi təchizat zəncirini ciddi şəkildə pozub.
"Alternativ çatdırılma yolları mövcud olsa da, onların xərci qat-qat yüksəkdir. Bəzi maddələrin təchizat zənciri o qədər mürəkkəbdir ki, bu vəziyyət zamanla defisitə gətirib çıxara bilər", - deyə CEPII İqtisadi Tədqiqatlar Mərkəzinin nümayəndəsi Dəniz Yünal bildirib.
Məqalədə vurğulanır ki, etilen, karbamid və parafin kimi bir çox komponentlər birbaşa Fars körfəzi ölkələrindən gətirilir. "Coface" sığorta şirkətinin məlumatlarına əsasən, ilk növbədə bəzi antibiotiklər və parasetamol risk altındadır. Şirkət təmsilçisi Co Duayi bildirib ki, cəmi bir neçə avrosentə satılan dərmanların istehsalında neftdən böyük asılılıq var: "Bu sistem təzyiqə məruz qaldıqda təkcə qiymətlər artmır, həm də bəzi maddələrin fiziki tədarükü mümkünsüzləşir".
Daha əvvəl "Le Parisien" qəzeti İnşaat Sahəsi Kiçik Müəssisələr Konfederasiyasına (Capeb) istinadən yazıb ki, İrandakı böhran səbəbindən Fransada tikinti materiallarının qiyməti kəskin şəkildə bahalaşıb.
