Hörmüz boğazında gəmiçiliyin tam bərpa edilməsi üçün ABŞ və İran arasında xüsusi qaynar xəttin yaradılmasına ehtiyac duyulur.
Oxu.Az xəbər verir ki, bu barədə Qətərin Baş naziri Məhəmməd bin Əbdülrəhman Al Tani "Financial Times" (FT) nəşrinə verdiyi müsahibəsində bildirib.
Onun sözlərinə əsasən, İsveçrədəki danışıqlar zamanı tərəflərin razılaşdırdığı belə bir rabitə kanalı dezinformasiyaların qarşısını almaq və mühüm su yolunun minalardan təmizlənməsi prosesində fəaliyyətləri koordinasiya etmək üçün zəruridir. Tehran və Vaşinqton arasında Pakistanla birlikdə vasitəçi rolunu icra edən Qətər hökumətinin başçısı qeyd edib ki, bəzən süni şəkildə qarışıqlıq yaratmaq cəhdləri kimi hallarla üzləşirlər.
"Buna görə də qaynar xəttin əsas məqsədi, təhlükə altında olan istənilən gəminin İran tərəfindən yoxlanılaraq təhlükəsiz şəkildə yoluna davam etməsini təmin etməkdir", - deyə nəşrin həmsöhbəti vurğulayıb.
