Husilərin Yəmənlə sərhəddə yerləşən Səudiyyə Ərəbistanının Nəcran əyalətini atəşə tutması nəticəsində 11 dinc sakin yaralanıb.
Oxu.Az xəbər verir ki, bu barədə Səudiyyə Ərəbistanının rəhbərlik etdiyi ərəb koalisiyasının rəsmi nümayəndəsi, briqada generalı Türki əl-Maliki məlumat verib.
"Cümə axşamı (6 avqust) husilərin Nəcran bölgəsində həyata keçirdiyi terror hücumları nəticəsində 11 mülki şəxs yaralanıb. Onlardan yeddisi Səudiyyə Ərəbistanı vətəndaşıdır. Onlar arasında qadın və uşaq da var", - deyə "X" sosial şəbəkəsindəki məlumatda qeyd olunur.
Xəsarət alanlar arasında, həmçinin bir Yəmən, iki Misir və bir Pakistan vətəndaşı da var. Əl-Maliki vurğulayıb ki, mülki obyektlərin atəşə tutulması beynəlxalq humanitar hüququn kobud şəkildə pozulması deməkdir.
"Koalisiya qüvvələrinin birgə komandanlığı mülki əhalinin müdafiəsi məqsədilə bu cür terror təcavüzlərinə qarşı bütün zəruri çəkindirici tədbirləri görməyə davam edəcək", - deyə koalisiya qüvvələrinin nümayəndəsi bildirib.
