İran Trampa GÜVƏNMİR - ABŞ ilə yeni saziş məsələsinə Tehrandan münasibət

ABŞ ilə yeni sazişin bağlanması İranın milli maraqlarına cavab verməyəcək.

Oxu.Az-ın TASS-a istinadən verdiyi məlumata görə, bunu İslam Respublikasının birinci vitse-prezidenti Mohammad Reza Aref bildirib.

O deyib ki, ABŞ-yə nə əvvəl, nə də indi inanmaq olar.

"ABŞ ilə saziş hər iki tərəf üçün faydalı olmalıdır. Bu gün biz ABŞ ilə sazişin bizim maraqlarımıza cavab verəcəyini düşünmürük", - deyə o bildirib.

Siyasətçinin sözlərinə görə, ABŞ Prezidenti Donald Tramp keçmişdə artıq ona etibar etməyin mümkün olmadığını göstərib.

"Çətin ki, indi o, öz davranışını dəyişsin", - deyə Aref qeyd edib.

Fevralın 4-də Tramp ABŞ-nin İrana maksimum təzyiqinin bərpası haqqında fərman imzalayıb. Sənəd Vaşinqtonun İran neftinin ixracının azaldılmasına yönəlmiş səylərinin aktivləşdirilməsini nəzərdə tutur.

Eyni zamanda ABŞ lideri İran prezidenti Məsud Pezeşkian ilə görüşün mümkünlüyünü istisna etməyib və Tehranla "əla saziş" bağlamaq istəyini bildirib.

Fevralın 7-də İranın Ali Rəhbəri Ayətullah Əli Xamenei bəyan edib ki, ABŞ ilə danışıqlar aparmaq olmaz, çünki onlar bir dəfə artıq Tehranı aldadıblar.

"Vaşinqton nüvə sazişi bağlayıb, onun şərtlərini yerinə yetirməyib, İrana qarşı sanksiyaları götürməyib və bu sazişi birtərəfli qaydada ləğv edib", - deyə Xamenei xatırladıb.