"Təxminən 34 xarici aviaşirkət, o cümlədən bir neçə Avropa şirkəti, İrana uçuşlarını davam etdirir".
Oxu.Az ISNA-ya istinadən xəbər verir ki, bu barədə Tehrandakı İmam Xomeyni adına Beynəlxalq Hava Limanının direktoru Səid Çalandari məlumat verib.
"Hazırda "Lufthansa", "Austrian Airlines", "Qatar Airways" və "Emirates" də daxil olmaqla təxminən 34 xarici aviaşirkət bu hava limanına uçuşlar həyata keçirir. Xarici uçuşlarla bağlı heç bir məhdudiyyət yoxdur", - deyə o bildirib.
Çalandarinin sözlərinə görə, İran Mülki Aviasiya Təşkilatı müvafiq icazə verdiyi təqdirdə, İmam Xomeyni adına Beynəlxalq Hava Limanı istənilən xarici aviaşirkətin təyyarələrini qəbul etməyə hazırdır.
Qeyd edək ki, 23 fevralda "Lufthansa"nın mətbuat xidməti şirkətin daxil olduğu "Lufthansa Group"un Tehran reyslərini 28 fevrala qədər dayandırdığını açıqlamışdı.
Xatırladaq ki, ötən ilin oktyabrında Avropa İttifaqı İranın milli aviadaşıyıcısı "Iran Air", ən böyük özəl aviaşirkəti "Mahan Air" və ordunun Hərbi Hava Qüvvələrinə məxsus "Saha Airlines"ə Rusiyaya raket və PUA tədarükü ittihamı ilə sanksiya tətbiq etmişdi.
