“İslam dövləti” qruplaşmasının (İŞİD) yaraqlılarının ələ keçirdikləri Yaponiya vətəndaşlarından birinin başını kəsdiyi güman edilir.
Oxu.Az xəbər verir ki, bu barədə islamçıların internetdəki fəaliyyətini izləyən SİTE təşkilatı məlumat yayıb.
SİTE-nin məlumatına görə, yaraqlılar öldürülmüş jurnalist Harun Yukavanın fotoşəkilini və ikinci girov Kendzi Qotonun İŞİD-in yeni tələblərini səsləndirdiyi videonu yayıblar. Terrorçular yapon hökumətinə Səcidə ər-Rişavi adlı qadının azad edilməsi üçün İordaniya rəhbərliy ilə danışıqlar aparmağı təklif edirlər.
“Hər şey çox sadədir, - Qoto videoda deyir. – Siz Səcidəni onlara verirsiz və mən azad olunacağam. Hazırda bu mümkündür, çünki bizim hökumətimiz (Yaponiya – red.) yaxınlıqdadır. Soruşacaqsınız niyə? Hökumət rəsmiləri taleyin gərdişi ilə indi İordaniyadadırlar və islamçıların bacısı da bu ölkədə saxlanılır”.
Qeyd edək ki, Səcidə ər-Rişavi əri ilə birlikdə 2005-ci ildə İordaniyada Radisson SAS mehmanxanasına hücumda iştirak etmiş terrorçu-kamikadzedir.
O, üzərindəki bomba partlamadığı üçün sağ qalıb. Hücumdan az sonra Səcidə həbs olunmuşdu. Hücum nəticəsində 57 nəfər həlak olub.
