İsveçdə Quranı yandıran iraqlının öldürülməsinə görə saxlanılanlar azad ediliblər

İsveçdə Quranı yandıran iraqlı mühacir Salvan Momikanın qətlinə dair işi aparan prokuror istintaq çərçivəsində saxlanılan beş şübhəlinin azadlığa buraxılmasına qərar verib.

Oxu.Az TASS-a istinadən xəbər verir ki, bu barədə prokurorluq məlumat yayıb.

"Onların cinayət törətdiyinə dair şübhələr azalıb və mən artıq insanları həbsdə saxlamaq üçün heç bir səbəb görmürəm", - ibtidai istintaqa rəhbərlik edən baş prokuror Rasmus Ohman bildirib.

Qeyd olunur ki, şübhələr tam aradan qaldırılmayıb, müstəntiqlər nə baş verdiyini və cinayətin arxasında kimin dayandığını öyrənməyə davam edirlər.

Xatırladaq ki, Quranı yandıran 38 yaşlı iraqlı qaçqın yanvarın 29-u axşam "TikTok"da canlı yayım edərkən yaşadığı binada öldürülüb. Yanvarın 30-da Stokholm Dairə Məhkəməsi Momika barəsində hökm çıxarmalı idi.