"Johnson & Johnson" şirkəti uşaq kirşanı və digər "talk" tərkibli məhsullarının yumurtalıq xərçənginə səbəb olduğunu iddia edən onminlərlə şikayəti həll etmək üçün təxminən 5.5 milyard dollar ödəyəcəyini açıqlayıb. Bu razılaşma on ildir davam edən məhkəmə çəkişmələrinə son qoya bilər.
Oxu.Az xəbər verir ki, bu barədə "The Guardian" nəşri məlumat yayıb.
Şirkətin bəyanatına əsasən, razılaşma Nyu-Cersi federal məhkəməsində birləşdirilən və ştat məhkəmələrində baxılan təqribən 76 min iddianı əhatə edir. Bu, şirkətə qarşı irəli sürülən demək olar ki, bütün şikayətlər deməkdir. Bundan əvvəl "Johnson & Johnson" "talk"ın tərkibində asbestin olması və mezoteliomaya (xərçəng növü) yol açması ilə bağlı iddiaların böyük hissəsini artıq həll etmişdi.
İddiaçıların hüquq firmaları bu razılaşmanı dəstəkləyərək onu onillik hüquqi mübarizənin layiqli yekunu adlandırıblar. Sazişin qüvvəyə minməsi üçün yumurtalıq xərçəngi ilə bağlı müraciət edən iddiaçıların 95%-i onu qəbul etməlidir.
"Johnson & Johnson"un məhkəmə işləri üzrə vitse-prezidenti Erik Haas iddiaları "əsassız" adlandırsa da, məsələni yekunlaşdırmaq xatirinə razılığa gəlməyə hazır olduqlarını bildirib. Şirkət 2027-ci ildə 3 milyard dollar ödəməyi və ödənişləri 2028-ci ildə də davam etdirməyi planlaşdırır. Lakin iddiaçıların vəkili Kris Sigerin sözlərinə görə, qoşulanların sayından asılı olaraq yekun məbləğ 7 milyard dolları və ya daha çoxunu təşkil edə bilər.
Qeyd edək ki, bu razılaşma şirkətin fərdi məhkəmə proseslərindəki qələbələrindən sonra əldə edilib. Ötən həftə federal hakim də iddiaçıların məhz "talk"ın xəstəliyə səbəb olduğunu sübut etmək imkanını şübhə altına almışdı.
