Kanada Almaniyaya məxsus TKMS gəmiqayırma müəssisəsindən 12 ədəd dizel mühərrikli sualtı qayıq əldə edib və bu müqavilə dövlət tarixinin ən böyük satınalması kimi qeydə alınıb.
Oxu.Az-ın "Financial Times" (FT) nəşrinə istinadən verdiyi məlumata görə, müvafiq açıqlama ilə Kanadanın Baş naziri Mark Karni çıxış edib.
Qeyd olunan hərbi texnika 3 min ton su tutumuna malikdir və arktik iqlim şəraitində fəaliyyət göstərmək üçün nəzərdə tutulan dizel sualtı qayıqlarıdır. Tədarük planına əsasən, ilk dörd qayıq 2034-cü ilədək Kanadaya təhvil verilməlidir.
"Bu satınalma Kanada tarixində ən böyüyü olacaq və plana görə, bu proses, şübhəsiz ki, bütün Kanada üzrə müdafiəyə yatırılan istənilən sərmayə arasında ən böyük iqtisadi təsirə malik olacaq", - deyə Karni bildirib.
TKMS şirkətinin baş direktoru Oliver Burkhard şirkətin belə böyük sifarişi yerinə yetirə biləcəyinə əminliyini ifadə edib. Öz növbəsində, Almaniyanın kansleri Fridrix Merts isə Kanadanın bu addımını "Avropa və transatlantik müdafiə sənayesi çərçivəsində tərəfdaşlıq üçün verilən güclü siqnal" adlandırıb.
Bildirilir ki, sualtı qayıqların alınmasını nəzərdə tutan bu saziş Kanadanın genişmiqyaslı hərbi strategiyasının tərkib hissəsidir. Müqavilə ABŞ Prezidenti Donald Trampın NATO üzrə müttəfiqlərinə təhlükəsizlik təminatı verməyi dayandıracağı ilə bağlı səsləndirdiyi xəbərdarlıqlar fonunda imzalanıb.
