Kolumbiya Prezidenti Qustavo Petronun təyyarəsinə ABŞ sanksiyaları səbəbindən İspaniyada yanacaq doldurulmasından imtina edildi.
Oxu.Az-ın xəbərinə görə, bu barədə İspaniyanın "El Pais" qəzeti məlumat verib.
Məlumata görə, Səudiyyə Ərəbistanına uçuş zamanı Kolumbiya Prezidenti Qustavo Petronun "Boeing 737-700" təyyarəsi yanacaq doldurmaq üçün Madriddəki Baraxas hava limanında texniki dayanacaq edib.
Lakin bütün şirkətlər ABŞ sanksiyalarına məruz qalacaqlarından narahat olduqları üçün ona aviasiya yanacağı verməkdən imtina ediblər. Bu sanksiyalar Petroya qarşı "narkotik qaçaqmalçılığında əli olma" ittihamı üzrə tətbiq edilib.
Nəticədə prezident təyyarəsi alternativ yanacaq doldurma variantları axtarmağa məcbur olub.
İspaniya mediasının öz mənbələrinə istinadən xəbərinə görə, nəticədə, İspaniya hökumətinin köməyi ilə təyyarə hərbi aviabazaya yönləndirilib və orada yanacaq doldura bilib.
Kolumbiya hakimiyyəti hadisəni "qəbuledilməz" kimi qiymətləndirərək, nümayəndə heyətinin təhlükəsizliyi üçün risk yaratdığını bildirib.
Qeyd edək ki, ötən həftə Qustavo Petro ABŞ-nin narkotik qaçaqmalçılığı ilə əlaqədə ittiham etdiyi şəxslərin siyahısı olan OFAC siyahısına daxil edilib. ABŞ Maliyyə Nazirliyi hesab edir ki, o, Kolumbiyada kokain istehsalının artmasına görə məsuliyyət daşıyır. Qustavo Petro isə bu iddiaları rədd edir.
Onunla birlikdə siyahıya həyat yoldaşı Veronika Alkoser, böyük oğlu Nikolas Petro Burqos və daxili işlər naziri Armando Benedetti də daxil edilib.
Kolumbiya hökuməti prezidentin və ailəsinin sanksiya siyahısına əlavə edilməsini "şərəf və ləyaqəti pozan təhqir" adlandırıb.
Bir ay əvvəl, sentyabrın sonunda ABŞ Kolumbiya prezidentinin Nyu-Yorkdakı etiraz aksiyalarında iştirakından sonra vizasını ləğv etmişi. Xüsusilə, o, ABŞ hərbçilərini Trampın əmrlərinə əhəmiyyət verməməyə çağırmışdı.
:640.jpg)
