Kolumbiya ABŞ hökumətinin xüsusi lisenziyası olmadan Venesueladan təbii qaz idxal edə bilməyəcək. Bunu ölkənin mədən və energetika naziri Edvin Palma Karakasda Venesuela liderləri ilə görüşdən sonra bildirib.
Oxu.Az xəbər verir ki bu barədə 5-tv.ru məlumat yayıb.
Palma bildirib ki, əməliyyatı başa çatdırmaq mümkün olmayacaq, çünki Venesueladan tədarük üçün ABŞ hökumətindən lisenziya tələb olunur. Yeni lisenziyanın alınması isə bir qədər mürəkkəb və vaxt aparan işdir.
Bundan əlavə, Venesueladan alış-veriş yalnız ABŞ-nin təsdiqi ilə deyil, həm də iki ölkəni birləşdirən "Antonio Ricaurte" qaz boru kəmərinin uzun müddət istifadəsiz qalması səbəbindən çətinləşir. Yerli medianın məlumatına görə, kəmərin bərpası üçün əhəmiyyətli investisiya tələb olunur.
Nazirin sözlərinə görə, Kolumbiya artan təbii qaz çatışmazlığı ilə üzləşir. Ekspertlər mövcud ehtiyatların təxminən altı il kifayət edə biləcəyini bildirirlər, lakin bu artıq ölkənin bütün ehtiyaclarını ödəməyə yetmir.
