Ümumdünya Səhiyyə Təşkilatının (ÜST) məlumatına görə, Uqanda və Konqo Demokratik Respublikasında (KDR) Ebola virusu ilə bağlı rəsmi təsdiqini tapmış 32 yoluxma, eləcə də 500-dən artıq şübhəli fakt aşkarlanıb.
Oxu.Az-ın məlumatına əsasən, bu rəqəmləri ÜST-nin baş direktoru Tedros Adhanom Qebreyesus Cenevrə şəhərində baş tutan Ümumdünya Səhiyyə Assambleyasının 79-cu sessiyasındakı məruzəsində açıqlayıb.
Qebreyesusun sözlərinə görə, KDR-in şimal hissəsində yerləşən İturi əyalətində indiyədək 30 nəfərin virusa yoluxduğu dəqiqləşib: "Uqanda tərəfi isə paytaxt Kampalada təsdiqlənmiş iki xəstələnmə faktı barədə ÜST-ni məlumatlandırıb. Həmçinin, Konqo Demokratik Respublikasından gəlmiş həmin iki şəxsdən birinin artıq öldüyü məlum olub".
Təşkilat rəhbəri vurğulayıb ki, rəsmiləşmiş hallarla yanaşı, 500-ü aşan şübhəli fakt və 130 ölüm hadisəsi mövcuddur. O, bölgədəki fəaliyyətlərin, xüsusilə də nəzarət tədbirlərinin artırılması, təmasda olanların axtarışı və laborator yoxlamaların miqyası böyüdükcə bu göstəricilərin yenilənəcəyini diqqətə çatdırıb.
İlkin göstəricilərə əsasən, Konqo Demokratik Respublikasının (KDR) şərq regionlarında Ebola virusunun növbəti dəfə yayılması səbəbindən 120-yə yaxın insan ölüb.
Oxu.Az-ın "Radio Okapi"yə istinadla xəbərinə əsasən, sözügedən məsələ ilə bağlı dövlət hökumətinin rəsmi sözçüsü Patrik Muyaiya açıqlama verib.
"İşçi qruplarımız infeksiyaya şübhəli olan faktları aşkar edir. Bu tarixə qədər (18 may - red.) 118 nəfərin ölümü faktı qeydə alınıb. Həmin faktların bilavasitə virusla bağlı olub-olmaması hələ də tədqiq edilir", - deyə P.Muyaiya keçirilən mətbuat konfransında qeyd edib.
KDR-in rəsmi nümayəndəsinin bildirdiyinə əsasən, Şimali Kivu və İturi əyalətlərində 435 nəfərdə yoluxma şübhəsi müəyyənləşib. P.Muyaiya əhalini təşvişə düşməməyə və qoruyucu qaydalara ciddi şəkildə əməl etməyə səsləyib.
Qeyd edək ki, KDR-in səhiyyə qurumları mövcud Ebola virusunun əsas ocağı sayılan İturi əyalətindən ilkin təhlükə mesajlarını mayın 5-də qəbul edib. Konqonun tibb nümayəndələri doqquz gündən sonra "Ebola-Bundibugyo" ştammını aşkar etdilər. Bunun ardınca dərhal qonşu Uqanda və Konqo Demokratik Respublikasında Ebola epidemiyasının başladığı bildirildi. May ayının 17-nə keçən gecə isə Ümumdünya Səhiyyə Təşkilatı (ÜST) hər iki dövlətdə yayılan epidemiyanı qlobal səhiyyə üzrə fövqəladə vəziyyət elan edib.
