Koreya Respublikasında may ayının ortasından başlayaraq kəskin istilər səbəbindən ən azı 16 nəfər həyatını itirib.
Oxu.Az xəbər verir ki, bu məlumat Koreya Respublikası Daxili İşlər Nazirliyi yanında fəaliyyət göstərən fövqəladə hallar və təhlükəsizlik üzrə mərkəzi qərargahın rəsmi hesabatında öz əksini tapıb.
Milli Meteorologiya Agentliyindən bildirilib ki, avqustun 2-də havanın temperaturu son 122 ilin maksimumuna - 42.5°-yə çatıb. Növbəti gün meteorologiya xidməti ilk dəfə olaraq Seulun bəzi rayonları üçün şiddətli isti ilə bağlı xəbərdarlıq yayıb.
"Çoson ilbo" qəzetinin yazdığına görə, avqustun 3-də istilik görüntüləmə avadanlığı ilə təchiz olunmuş dronlar Kyöngido əyalətindəki tarlalarda fermerlərə yaxınlaşaraq onlardan işi dayandırmağı xahiş edib.
"İsti hava xəbərdarlığı elan edilib. Günün ən isti saatlarında - saat 14:00-dan 17:00-dək açıq havada işlərdən çəkinmək tövsiyə olunur", - deyə pilotsuz uçuş aparatlarından səsləndirilib.
