NASA alimləri "Hubble" teleskopunun 35 illik yubileyi münasibətilə məşhur Sombrero qalaktikasının (M104) görüntüsünü yenidən işləyib və inanılmaz detallarla zəngin fotosunu təqdim ediblər.
Oxu.Az-ın məlumatına görə, bu barədə agentliyin saytında xəbər verib.
Sombrero qalaktikası Yerə təxminən 30 milyon işıq ili uzaqlıqda yerləşir və Meksika papağını xatırladan formaya sahibdir. O 100 milyon işıq ili radiusunda ən massiv spiralvari qalaktikadır - təxminən 260 milyard Günəş kütləsi ilə Süd Yolu qalaktikasından 5 dəfə ağırdır, lakin ölçüsünə görə ondan kiçikdir.
Yeni emal metodları qalaktikanın parlaq mərkəzi hissəsini və onu əhatə edən nəhəng toz diskini görünməmiş detallarla ortaya çıxarıb.
Maraqlıdır ki, Sombrero cəmi 6 dərəcəlik bucaqla görünür və bu da onun Saturnun üzüklərinə bənzər effekt yaratmasına səbəb olur.
Alimlər hələ də dəqiq bilmirlər: bu qalaktika spiralvari yoxsa elliptikdir? Onun mərkəzində, Süd Yolundakından 2000 dəfə böyük bir superkütləvi qara dəlik yerləşir, lakin buna baxmayaraq, Sombrero qalaktikası çox sakitdir və ildə cəmi bir Günəş kütləsindən az miqdarda qaz ulduza çevrilir.
Yeni görüntülər sayəsində alimlər Sombreronun keçmişdə başqa bir qalaktika ilə birləşmiş ola biləcəyini düşünürlər. Bu birləşmə onun unikal formasını izah edə bilər.
