Fransa Prezidenti Emmanuel Makron Avropa Komissiyasının (AK) rəhbəri Ursula fon der Lyayenə müraciət edərək, 15 yaşınadək uşaqların sosial şəbəkələrdən istifadəsini qadağan edən ümumavropa qanununun hazırlanmasını xahiş edib.
Oxu.Az xəbər verir ki, bu barədə "Franceinfo" nəşri məlumat yayıb.
Məlumata görə, Fon der Lyayenə ünvanladığı məktubunda Makron yetkinlik yaşına çatmayanların müdafiə olunmasının və etibarlı yaş yoxlama sisteminin tətbiq edilməsinin vacibliyini vurğulayıb. Avropa Komissiyasının rəhbəri isə öz növbəsində müxtəlif yaş qrupları üçün sosial şəbəkələrə çıxışın məhdudlaşdırılması ilə bağlı təkliflərini bu payızda təqdim etməyi planlaşdırır.
Makron məsələyə sərt yanaşmanın tərəfdarıdır. O, 15 yaşa qədər şəxslərə qadağanın qoyulmasında, asılılıq yaradan alqoritmlərin tənzimlənməsində və tətbiqlərdən istifadə müddətinə məhdudiyyətlərin gətirilməsində israr edir. Fransa prezidenti qeyd edib:
"Yaş yoxlanışı məxfilik qaydalarına riayət edən etibarlı milli və Avropa həlləri kompleksinə əsaslanmalıdır".
Qeyd edək ki, avqust ayında Makron yuxarı sinif şagirdləri üçün telefonlardan istifadəni qadağan edən qanun imzalayıb. Dövlət başçısının sözlərinə görə, bu qadağa yeni tədris ilindən etibarən qüvvəyə minəcək.
İyulun sonunda isə Fransa parlamenti 15 yaşından kiçik şəxslər üçün sosial şəbəkələrin qadağan edilməsini nəzərdə tutan qanun layihəsini qəbul etmişdi. Məhdudiyyətlərin ilk mərhələsi sentyabrın 1-dən tətbiq olunmalı idi, lakin Konstitusiya Şurası bu addımı yetkinlik yaşına çatmayanların fikir ifadə azadlığının həddindən artıq məhdudlaşdırılması kimi qiymətləndirərək onu ləğv etdi.
