Maldiv adalarındakı sualtı mağarada tədqiqat apararkən həyatını itirən beş italiyalı dalğıcın hamısının meyiti sudan çıxarılıb.
Oxu.Az xəbər verir ki, bu barədə İtaliya Xarici İşlər Nazirliyinin nümayəndələri mətbuata açıqlamalarında bildiriblər.
Məlumata əsasən, yerli hərbi dalğıclar fin mütəxəssislərin dəstəyi ilə həlak olanların cəsədlərini "Köpək balığı mağarası" adlandırılan və təxminən 60 metr dərinliyi olan ərazidə aşkarlayıblar. İlkin mərhələdə boğulan şəxslərdən üçünün meyiti çıxarılıb, xilasetmə və axtarış işləri isə tam olaraq çərşənbə günü yekunlaşıb.
Beş İtaliya vətəndaşının həlak olması barədə rəsmi məlumat ilk dəfə mayın 15-də yayılmışdı. Hadisənin dəqiq səbəbləri hələlik tam aydın deyil. Hazırda Romadan olan müstəntiqlər və mütəxəssislər, mərhumların üzərindəki sualtı kameraların qeydləri vasitəsilə faciənin təfərrüatını və qəzanın necə baş verdiyini araşdırırlar.
Sualtı qəzada məhv olan qrupda Genuya Universitetinin dəniz biologiyası üzrə professoru Monika Montefalkone, onun 22 yaşlı qızı, iki gənc tədqiqatçı və bir dalğıc təlimatçısı yer alırdı. Məlumata görə, onları dalğıc missiyasının yerinə yetirildiyi əraziyə çatdıran qayıqda əlavə olaraq daha 20 italiyalı sərnişin də olub.
