Yaponiya hakimiyyəti ABŞ-nin Beynəlxalq Cinayət Məhkəməsini (BCM) "ləğv etmək" planları ilə bağlı bəyanatlarından narahat olduğunu bildirib.
Oxu.Az-ın məlumatına görə, bu xəbəri yerli mətbuat orqanları yayımlayıb.
Yaponiya Nazirlər Kabinetinin rəsmisi Minoru Kihara məsələyə münasibət bildirərək qeyd edib: "Yaranmış vəziyyəti böyük narahatlıq hissi ilə, yaxından təqib edirik".
Rəsminin sözlərinə əsasən, Tokio hökuməti mövcud problem fonunda həm BCM və təşkilatın tərəfdaşları, həm də birbaşa Vaşinqtonla qarşılıqlı müzakirələr həyata keçirməyi planlaşdırır.
Yaponiyanın bu reaksiyası Amerika Birləşmiş Ştatlarının dövlət katibi Marko Rubionun "The Wall Street Journal" nəşrində çıxan məqaləsindən dərhal sonra qeydə alınıb. Həmin yazıda Rubio qeyd etmişdi ki, ABŞ rəhbərliyi zərurət yaranarsa, BCM-in fəaliyyətinə mərhələli şəkildə xitam verəcək.
Fərqli bir video müraciətində isə Rubio Beynəlxalq Cinayət Məhkəməsini heç kim tərəfindən seçilməyən qlobalist bürokratların" çalışdığı "radikal" bir qurum kimi xarakterizə edib. Dövlət katibi vurğulayıb ki, hazırkı dövrdə BCM və onun dəstəkçiləri ABŞ-yə qarşı birbaşa hərbi yolla deyil, məhz nizamnamələr, müxtəlif razılaşmalar və qondarma beynəlxalq hüquq vasitəsilə müharibə elan ediblər.
Qeyd edək ki, bir müddət öncə ABŞ rəhbərliyi Beynəlxalq Cinayət Məhkəməsinin məhkəmə heyətinə qarşı xüsusi sanksiyalar paketi tətbiq etmişdi.
ABŞ Roma Statutunun tərəfi deyil, bununla əlaqədar dəfələrlə BCM-in Amerika vətəndaşları üzərində yurisdiksiyasını tanımadığını bəyan edib.
