Monqolustanda iqlim dəyişikliyi mal-qaranın sayının kəskin artması ilə birlikdə ölkə ərazisinin 77%-də torpağın fəlakətli deqradasiyasına səbəb olub.
Oxu.Az-ın MK.ru-ya istinadən xəbər verir ki, bu həyəcanverici statistikanı Monqolustan Elmlər Akademiyasının Coğrafiya və Geoekologiya İnstitutunun direktoru Avirmediyon Daştseren Ümumdünya Səhralaşma və Quraqlıqla Mübarizə Gününə həsr olunmuş açıq müzakirə zamanı səsləndirib.
Alimin sözlərinə görə, iqlim dəyişikliyi ekoloji böhranın əsas səbəbinə çevrilib. Son 60 ildə Monqolustanda istiləşmə sürəti dünya üzrə orta göstəriciləri üç dəfə üstələyib. Bu da tarixən öz sərt iqlim şərtləri ilə tanınan bölgədə yağıntıların normasının dəyişməsinə, quraqlıqların yaranmasının sürətlənməsinə və su ehtiyatlarının azalmasına səbəb olub.
Daştseren ikinci kritik amil kimi mal-qaranın sayının sosializm dövrü ilə müqayisədə demək olar ki, üç dəfə artmasını göstərib. Məhz otlaqların həddindən artıq çox olması monqol çöllərinin kövrək ekosistemlərinə ən çox dağıdıcı təsir göstərən amillərdəndir ki, bu da torpağın eroziyasına və biomüxtəlifliyin itirilməsinə gətirib çıxarır.
"Aktiv yol tikintisi və faydalı qazıntı yataqlarının işlənməsi əlavə mənfi təsir göstərir", - deyə ekspert qeyd edib.
Eyni zamanda, təbii ehtiyatların - kömür, qızıl, mis, uran və gümüşün ixracı ölkənin dövlət büdcəsinin əsasını təşkil edərək, mürəkkəb iqtisadi dilemma yaradır.
Monqolustan dünyada azsaylı ölkələrdən biridir ki, ənənəvi köçəri maldarlıq qədim zamanlardan dəyişməz qalıb. Bu sahə dövlətin ÜDM-nin 11.6%-ni təmin edir və mədənçıxarma sənayesi ilə bərabər əsas iqtisadi sektor hesab edilir. Bununla belə, bu iqtisadi modelin ekoloji dəyəri də getdikcə daha aydın görünür.
