NATO üzv dövlətlərinin müdafiə nazirləri Şimali Atlantik Alyansının Avropa sərhədlərində “hərbi Şengen” zonasını yaratmaqla bağlı razılığa gəlib.
Oxu.Az xəbər verir ki, bu barədə “RİA Novosti” Brüsseldən olan hərbi-diplomatik mənbəyə istinadən məlumat yayıb.
NATO müdafiə nazirləri Brüsseldə keçirilən toplantıda hərbi qüvvələr və vasitələrin Avropaya göndərilməsinin təmin olunması üzrə komanda qərargahının yaradılması planını dəstəkləyib.
“Bir növ “hərbi Şengen” zonasının yaradılması nəzərdə tutulur”, – deyə agentliyin müsahibi bildirib.
Bu ideyanı ilkin olaraq ABŞ-ın Avropadakı quru qoşunlarının keçmiş komandanı, general-leytenant Ben Hocs irəli sürüb.
Onun sözlərinə görə, müttəfiq ölkələrin qoşunları və hərbi texnikası Avropa hüdudlarında ölkədən-ölkəyə miqrantlar kimi asan və çevik şəkildə hərəkət edə bilməlidir.
