Norveç şahzadəsi Mette-Marit ağciyər köçürülməsi prosedurunu uğurla tamamladıqdan sonra müalicə aldığı tibb müəssisəsindən evə buraxılıb.
Oxu.Az-ın məlumatına əsasən, bu xəbəri Norveç kral sarayının mətbuat xidməti rəsmən açıqlayıb.
"Əlahəzrət vəliəhd şahzadə Mette-Marit ağciyər transplantasiyasından sonra Mərkəzi Hospitaldan evə buraxılıb", - deyə məlumatda bildirilib. Vəliəhd şahzadə iyunun ortalarında əməliyyat keçirib.
Şahzadə ailə üzvlərinə və tibb personalına minnətdarlığını ifadə edərək, "orqan bağışlamağa razı olan hər bir şəxsə" xüsusi təşəkkür edib. Kral ailəsi, həmçinin vurğulayıb ki, bərpa mərhələsində vəliəhd şahzadənin rəsmi görüşlərdə iştirakı nəzərdə tutulmur.
Qeyd edək ki, Norveç şahzadəsinə hələ 2018-ci ildə ağciyər fibrozu diaqnozu təyin edilmişdi. Cari ilin iyun ayının 5-də isə kral ailəsi Mette-Maritin vəziyyətinin kəskin ağırlaşması səbəbindən orqan nəqli üçün gözləmə siyahısına əlavə olunduğunu elan etmişdi. Tibb mütəxəssislərinin qənaətinə görə, transplantasiya həyata keçirilməsəydi, onun cəmi bir il yaşama ehtimalı var idi.
