Hindistanla gərginlik davam edir: Pakistan genişmiqyaslı hərbi təlimlər keçirib

Pakistan Silahlı Qüvvələri Hindistanla hərbi gərginliyin artması fonunda döyüş hazırlığını gücləndirmək məqsədilə təlimlər keçirib.

Oxu.Az xəbər verir ki, bu barədə "The Times of India" nəşri məlumat yayıb.

İslamabaddan 60 km aralıda yerləşən Kamra aviabazasında yerləşdirilmiş qırıcı təyyarələr düşmənin hava hücumlarının dəf edilməsi üzrə məşqlər çərçivəsində təlim uçuşları həyata keçiriblər. Eyni zamanda, Pakistan ordusu Tilla poliqonunda döyüş atışları ilə təlimlər aparıb.

Analitiklərə görə, bu addımlar Pakistanın Hindistan ordusu ilə mümkün qarşıdurmalara hazırlıqlı olduğunu göstərən bir siqnaldır.

Digər tərəfdən, cümə axşamı Hindistan Hərbi Hava Qüvvələri də Pakistanla sərhədə yaxın ərazidə "Aakraman" ("Hücum") kod adı altında genişmiqyaslı hərbi təlimlər keçirib. Təlimlərdə "Su-30MKI" və "Rafale" qırıcıları, həmçinin "Surat" esminesi iştirak edib.

12:26

Pakistan ordusunun texnikaları şimala, Cammu və Kəşmir istiqamətinə köçürülür.

Oxu.Az-ın məlumatına görə, sosial şəbəkələrdə yayılan videolarda Ravalpindi şəhərindən keçən hərbi kolonlar göstərilir.

Xatırladaq ki, aprelin 22-də Cammu və Kəşmir bölgəsində terror aktı baş verib. Silahlı döyüşçülər Baysaran vadisindəki cığırla qalxan turistlərə avtomat silahlardan atəş açıblar. Hücum nəticəsində 26 nəfər həlak olub. Terror aktına görə məsuliyyəti Pakistandan əraziyə daxil olan Əfqanıstanın "Müqavimət Cəbhəsi" qruplaşması öz üzərinə götürüb.

Bu hadisənin fonunda Pakistan və Hindistan arasında münasibətlər gərginləşib.