"Nüvə dövlətləri olan Pakistan və Hindistan arasında münaqişə təhlükəsi bütün dünya ölkələrinin narahatlığına səbəb olub".
Oxu.Az-ın məlumatına görə, bu barədə Pakistan Müdafiə Nazirliyinin rəhbəri Xavaca Asif "Sky News"a müsahibəsində bildirib.
"İki nüvə dövlətinin toqquşması həmişə narahatlıq doğurur. Əgər nəsə səhv getsə, bu qarşıdurma faciə ilə nəticələnə bilər", - deyə qurum rəhbəri bildirib.
Nazir Pahalqamdakı terror aktından sonra iki ölkə arasında gərginliyin artması ilə əlaqədar Pakistan ordusunun Hindistanın istənilən hərəkətinə ölçülüb-biçilmiş cavab verməyə hazır olduğunu vurğulayıb.
Bununla belə, o, Pakistan və Hindistan arasında tammiqyaslı müharibənin başlama ehtimalını da istisna etməyib.
Hindistan Hind çayının Pakistana axınının qarşısını almaq üçün bütün su bəndlərini bağlayıb.
Oxu.Az mk.ru-ya istinadən xəbər verir ki, bu, 1960-cı ildə Hind çayı suları haqqında saziş imzalandıqdan sonra ilk dəfədir belə hadisə baş verir.
Həmin sazişdə tərəflər siyasi münaqişələrə baxmayaraq, su resurslarını bölüşmək razılığına gəliblər.
Daha əvvəl Pakistan çayın axınının kəsilməsi cəhdlərini müharibə aktı kimi qiymətləndirəcəyini bildirib.
Pakistan hökuməti Hindistanın Hind çayının su axınını dəyişdirməyə cəhd edəcəyi təqdirdə cavab tədbirləri görəcəyini bəyan edib.
Oxu.Az-ın TASS-a istinadla verdiyi məlumata görə, bu barədə ölkənin Milli Təhlükəsizlik Şurasının bəyanatında qeyd olunub .
Bildirilib ki, Hind Suları Müqaviləsi Dünya Bankının vasitəçiliyi ilə imzalanmış məcburi beynəlxalq razılaşmadır və onun birtərəfli şəkildə ləğvi hüquqi baxımdan mümkün deyil.
Rəsmi açıqlamada vurğulanır ki, Hind çayının suları Pakistanın 240 milyonluq əhalisi üçün həyati əhəmiyyət daşıyır və bu sudan istifadə hüququ istənilən qiymətə qorunacaq.
"Hind Suları Müqaviləsinə əsasən Pakistana məxsus su axınının dayandırılması və ya istiqamətinin dəyişdirilməsinə hər hansı cəhd müharibə aktı kimi dəyərləndiriləcək", - deyə Milli Təhlükəsizlik Şurasının bəyanatında qeyd olunub.
Pakistan Hindistanın ölkədəki Ali Komissarlığının müdafiə, hərbi-dəniz qüvvələri və aviasiya məsələləri üzrə məsləhətçilərini "persona non-grata" elan edib.
Oxu.Az-ın TASS-a istinadən məlumatına görə, bu barədə Pakistan Baş nazirinin katibliyi tərəfindən ölkənin Milli Təhlükəsizlik Şurasının iclasının nəticələrinə dair yayılan press-relizdə deyilir.
"Onlara dərhal və 30 aprel 2025-ci ildən gec olmayaraq Pakistanı tərk etmək tapşırılıb. Hindistanın Ali Komissarlığındakı bu vəzifələr ləğv edilmiş hesab olunur. Bu məsləhətçilərin köməkçi heyəti də Hindistana qayıtmalıdır", - deyə press-relizdə vurğulanıb.
Bundan əlavə, Pakistan Təhlükəsizlik Şurası Hindistan diplomatik missiyasının heyətinin 30 nəfərə qədər azaldılmasına qərar verib.
İslamabad Nyu-Delhi ilə bütün ikitərəfli sazişlərin fəaliyyətini dayandırır.
Oxu.Az bu barədə TASS-a istinadən xəbər verir.
Bildirilir ki, qərar mübahisəli Cammu və Kəşmir regionunda baş vermiş terror aktına cavab olaraq Pakistan Milli Təhlükəsizlik Şurasının iclasında qəbul edilib.
Pakistan, həmçinin Hindistanla sərhəddə yerləşən "Vagah" nəzarət-buraxılış məntəqəsini bağlayır, Hindistan və hindistanlıların idarə etdikləri aviaşirkətlər üçün öz hava məkanını qapayır. Sərhədi keçmək üçün etibarlı icazəsi olanlar 30 aprelə qədər geri qayıda bilərlər.
