Pakistanda yerləşən Broud-Pik dağında baş verən qar uçqunu dünya rekordu sahibi, nepallı alpinist Nirmal Purcanın həyatına son qoyub.
Oxu.Az "İzvestiya"ya istinadən xəbər verir ki, bu barədə onun təsis etdiyi "Elite Exped" komandasının nümayəndələri məlumat yayıblar.
"Böyük kədər hissi ilə təsdiqləyirik ki, Nirmal Purca Broud-Pikdə baş verən qar uçqunu nəticəsində faciəli şəkildə həlak olub. Təəssüf ki, ekspedisiyanın digər iştirakçılarının da sağ qalmadığı təsdiqlənib", - deyə açıqlamada bildirilib.
Nirmal Purca nepallı alpinist və Böyük Britaniyanın xüsusi təyinatlı qüvvələrinin sabiq hərbçisi idi. O, 2019-cu ildə əldə etdiyi dünya rekordu ilə geniş tanınıb.
Purca dünyada hündürlüyü 8 min metrdən çox olan 14 zirvənin hamısını cəmi 6 ay 6 gün ərzində fəth etməklə tarixə düşmüşdü. Ondan əvvəlki rekordun sahibi isə bu zirvələri təxminən 8 ilə tamamlamışdı.
Pakistanda yerləşən Broud-Pik dağında (8 051 metr) qar uçqunu nəticəsində əlaqə kəsilən 10 alpinistdən 8-nin meyiti xilasedicilər tərəfindən aşkar edilib.
Oxu.Az xəbər verir ki, bu barədə "Geo TV" telekanalı məlumat yayıb.
Bundan əvvəl yürüş iştirakçılarından dördünün cəsədinin tapıldığı bildirilmişdi. Qrupun itkin düşən digər iki üzvünün axtarışları isə hazırda davam etdirilir.
Qeyd edək ki, iyulun 29-da Nepal, Pakistan, ABŞ, Oman və Çindən olan alpinistlər komandası Broud-Pik zirvəsinə doğru yürüşə başlayıb. Ekspedisiyaya 2019-cu ildə dünyanın ən yüksək 14 zirvəsini rekord qısa müddətdə fəth edən məşhur nepallı alpinist Nirmal Purca rəhbərlik edib. İyulun 30-da dağda uçqun baş verib və bundan sonra qrupla əlaqə tamamilə kəsilib.
GPS sensorlarının məlumatlarına əsasən, idmançılar uçqun nəticəsində bir kilometr aşağı yuvarlanıblar.
Axtarış-xilasetmə əməliyyatına Pakistan ordusuna məxsus iki helikopter cəlb olunub. Pakistanla Çin sərhədində yerləşən Broud-Pik dağı dünyanın 12-ci ən yüksək zirvəsidir və bölgədəki çox çətin fəth edilən nöqtələrdən biri hesab edilir.
