"Telegram"ın və "VKontakte"nin yaradıcısı Pavel Durov bəyan edib ki, indiki nəslin nümayəndələri azad internetin son şahidi ola bilərlər.
Oxu.Az xəbər verir ki, 41 yaşını tamamlayan Durov bu düşüncələrini ad günü münasibətilə "Telegram" kanalındakı statusunda yazıb.
"Bizim nəslin nümayəndələrinin atalarımızın bizim üçün yaratdığı azad interneti xilas etməyinə getdikcə daha az vaxt qalır. Bir vaxtlar azad məlumat mübadiləsi kimi vəd edilən nə vardısa, artıq güclü nəzarət alətinə çevrilir", - deyə o qeyd edib.
Durov xatırladıb ki, Böyük Britaniya rəqəmsal şəxsiyyət vəsiqələrini, Avstraliya yaşın onlayn yoxlanılması, Avropa İttifaqı isə şəxsi mesajların kütləvi skanlaşdırılması qaydalarını tətbiq edir:
"Almaniyada məmurları internetdə tənqid edənlər təqib olunur, Fransa isə azadlığı və şəxsi həyatın toxunulmazlığını müdafiə edən texnologiya şirkətlərinin liderlərini təqib edir".
O fikirlərini yekunlaşdıraraq yazıb: "Biz yatarkən qaranlıq, antiutopik dünya sürətlə yaxınlaşır. Bizim nəsil tarixə azadlığı olan, lakin azadlığının əlindən alınmasına icazə verən sonuncu nəsil kimi düşmək riski ilə üzləşir. Bizi inandırırlar ki, ən böyük mübarizəmiz əcdadlarımızın bizə qoyub getdiyi hər şeyi - ənənələri, şəxsi həyatın toxunulmazlığı hüququnu, suverenliyi, azad bazarı və söz azadlığını məhv etməkdir. Ona görə də mən bu günü bayram etməyəcəyəm. Mənim az vaxtım var. Bizim az vaxtımız var".
