"Nvidia" şirkətinin baş direktoru Censen Huanq şirkətin səhiyyə məhsulları üzrə vitse-prezidenti Kimberli Pauell ilə sevgi münasibətində olub.
Oxu.Az xəbər verir ki, bu barədə "The New York Times" qəzeti öz mənbələrinə istinadən məlumat yayıb.
Nəşr qeyd edir ki, mart ayında Kaliforniyanın San-Xose şəhərindəki hoteldə keçirilən "Nvidia" konfransı zamanı 63 yaşlı Huanq və 48 yaşlı Pauellin bir-birinə qarşı səmimi davranışları videoya düşüb. Lakin qəzet həmin kadrların onlarda olmadığını vurğulayıb. Məlumatı şirkətin iki əməkdaşı təsdiqləyib.
Məlumata görə, Huanq və Pauell arasındakı əlaqə həm də nikahdankənar xarakter daşıyıb. Pauell 2008-ci ildən "Nvidia"da çalışır və 2017-ci ildə vitse-prezident vəzifəsinə təyin edilib. O, birbaşa Huanqa tabedir.
Qəzetin mənbələri iddia edirlər ki, şirkətdə onların bu münasibətindən xəbərdar olublar. Nəşr "Nvidia"nın daxili korporativ davranış məcəlləsinin müddəalarına da diqqət çəkib. Həmin sənəddə işçilərə maraqların toqquşmasına, o cümlədən şəxsi münasibətlərlə bağlı ziddiyyətlərə səbəb ola biləcək hallardan qaçınmaq tövsiyə olunur.
Xatırladaq ki, "Nvidia"nın rəhbəri Censen Huanq noyabrın 7-də direktorlar şurasına ABŞ kəşfiyyatının Pekinin xeyrinə məlumat toplamaqda şübhəli bildiyi qadınla intim əlaqəsi olduğunu etiraf etmişdi. Söhbət Amerika xüsusi xidmət orqanlarının Çin kəşfiyyatı ilə əlaqəli hesab etdiyi Elis Huanqdan gedir. Bundan dərhal sonra, noyabrın 8-də "Nvidia"nın direktorlar şurası müstəqil araşdırmaya başlayıb. Noyabrın 9-da "Nvidia" səhmdarları şirkətə və Huanqa qarşı kollektiv iddia qaldıraraq, onları iş adamının Huanqla əlaqəsi barədə məlumatı gizlətməkdə günahlandırıblar. İddia səhmdar Mark Kistenmaxer tərəfindən verilib.
"Forbes" jurnalı noyabrın 10-da məlumat yayıb ki, Huanqın sərvəti bir gün ərzində təxminən 7.4 milyard dollar azalaraq 154.7 milyard dollara düşüb. Nəşrin məlumatına görə, Huanqın həmin qadınla münasibətlərinin araşdırılması fonunda "Nvidia" səhmləri 5.5% ucuzlaşıb.
