Qırğızıstanda "Rusiya Evi"nin əməkdaşı həbs edilib

Qırğızıstanın Oş şəhərindəki "Rus Evi"nin əməkdaşı Nataliya Sekerina muzdluları cəlb etməkdə şübhəli bilinərək respublikanın xüsusi xidmət orqanları tərəfindən saxlanılıb.

Oxu.Az xəbər verir ki, bu barədə TASS-a Qırğızıstan Ali Məhkəməsindən məlumat verilib.

Sekerina barəsində istintaq müddətində, yəni 2025-ci il iyunun 17-dək həbs-qətimkan tədbiri seçilib.

Vətəndaşlığı dəqiqləşdirilən şübhəli şəxs Qırğızıstan Cinayət Məcəlləsinin başqa dövlətlərin silahlı münaqişələrində və ya dövlət hakimiyyətini devirməyə, yaxud ərazi bütövlüyünü pozmağa yönəlmiş zorakı hərəkətlərdə istifadə etmək məqsədilə muzdluların cəlb edilməsi, maliyyələşdirilməsi, maddi təminatı, təlimi, habelə hərbi münaqişələrdə və ya hərəkətlərdə muzdlulardan istifadə haqqında maddəsi ilə aparılan istintaq tədbirləri çərçivəsində saxlanılıb.

Bu işdə Sekerina ilə yanaşı, Oş meriyasının mətbuat xidmətinin əməkdaşı da daxil olmaqla daha dörd nəfər saxlanılıb.