Səudiyyə Ərəbistanı sahillərində, Qırmızı dəniz akvatoriyasında tankerə mərmi düşüb və yanğın başlayıb.
Oxu.Az xəbər verir ki, bu barədə Böyük Britaniya Hərbi Dəniz Qüvvələrinin Dəniz Ticarət Əməliyyatları üzrə Koordinasiya Mərkəzi (UKMTO) məlumat yayıb.
Mərkəzdən verilən açıqlamada qeyd olunur ki, hadisə Səudiyyə Ərəbistanının Yanbu şəhərindən 63 dəniz mili qərbdə qeydə alınıb. Təhlükəsizlik şirkətinin nümayəndəsinin sözlərinə görə, gəmiyə mənşəyi bilinməyən mərmi ilə zərbə endirilib və nəticədə tankerin əsas göyərtəsində yanğın meydana gəlib.
Qurumdan, həmçinin bildirilib ki, heyət üzvlərinin hamısı təhlükəsiz yerdədir və onların harada olduğu dəqiqləşdirilib. Ekoloji zərərlə bağlı hələlik heç bir məlumat daxil olmayıb. Hadisə ilə bağlı əlavə təfərrüat, o cümlədən gəminin adı və qeydiyyatda olduğu liman barədə məlumat açıqlanmayıb.
