Rumıniyada prezident seçkisi: İlk turda Marçel Çiolaku üstünlük qazandı

Rumıniyanın Sosial Demokrat Partiyasının lideri, Baş nazir Marçel Çiolaku bazar günü ölkədə keçirilən prezident seçkisinin birinci turunda səslərin 25%-ni toplayıb. İkinci yerdə 18,1% səs toplayan Yelena Laskonidir (mərkəzçi "Rumıniyanın Qurtuluşu Uğrunda Birlik" partiyası).

Oxu.Az TASS-a istinadən xəbər verir ki, bu "Exit-poll" məlumatları seçki məntəqələri bağlandıqdan dərhal sonra 21:00-da (Bakı vaxtı ilə 23:00) Şəhər və Regional Sosiologiya Mərkəzi tərəfindən açıqlanıb.

Seçkidə seçicilərin fəallığı 52,41% təşkil edib.

Prezidentliyə namizədin birinci turda seçilməsi üçün qeydə alınmış seçicilərin ən azı 50%-i üstəgəl 1 səs toplaması lazım olduğundan, dekabrın 8-də Çiolaku və Laskoninin iştirakı ilə seçkinin ikinci turu keçiriləcək.

24 noyabr, 14:15

Rumıniyada prezident seçkisinin birinci turu keçirilir.

Oxu.Az TASS-a istinadən xəbər verir ki, bu barədə Daimi Seçki Administrasiyasının rəhbəri Toni Qreble məlumat verib.

Onun sözlərinə görə, ölkədə 19 minə yaxın seçki məntəqəsi açılıb və xaricdəki seçki məntəqələrində də səsvermə davam edir.

Administrasiya rəhbəri aydınlaşdırıb ki, indiyədək səsvermə insidentsiz keçib.

Prezidentlik yarışının favoriti Sosial Demokrat Partiyasının lideri, Baş nazir Marcel Çiolakudur.

Namizədlərdən heç biri qalib gəlmək üçün tələb olunan 50%+1 səs toplamasa, dekabrın 8-də ən çox səs toplayan iki namizəd arasında ikinci tur keçiriləcək.