Ukrayna Hava Hücumundan Müdafiə (HHM) qüvvələri tərəfindən Reni şəhəri üzərində vurulan pilotsuz uçuş aparatı (PUA) Rumıniyanın Qalats şəhərindəki çoxmənzilli yaşayış binasına düşüb.
Oxu.Az "Gandul" nəşrinə istinadən xəbər verir ki, bu barədə jurnalistlərə Rumıniya Prezidenti Nikuşor Dan bildirib.
"Şərqdən gələn 43 pilotsuz uçuş aparatından ibarət qrup Ukrayna ərazisini Dunay çayından təxminən 20-30 kilometr şimalda, şərqdən qərbə doğru keçib. Ukrayna ərazisi üzərindən uçarkən onlardan bəziləri vurulub və yəqin ki, Reni şəhəri üzərində zədələnən PUA-lardan biri trayektoriyasını dəyişərək Qalats istiqamətinə yönəlib", - deyə N.Dan bildirib.
Qeyd edək ki, dron mayın 29-na keçən gecə Qalatsdakı çoxmənzilli binaya çırpılıb. 70 sakin təxliyə edilib, dörd nəfər xəsarət alıb. Rumıniya tərəfi hadisəyə görə məsuliyyəti Rusiyanın üzərinə qoyub. Rusiya Prezidenti Vladimir Putin isə pilotsuz aparatın qalıqlarının Rusiyada ekspertizadan keçirilməsini təklif edib.
Qalats şəhərində PUA-nın (Pilotsuz Uçuş Aparatı - dron) partlamasından sonra Rusiya səfiri Vladimir Lipayev Rumıniya Xarici İşlər Nazirliyinə çağırılıb.
Oxu.Az-ın Rusiya KİV-ə istinadən xəbərinə görə, bu barədə Rumıniya xarici işlər naziri Oana-Silviya Tsoyu məlumat verib.
"Rumıniyanın təhlükəsizliyi bizim mütləq prioritetimizdir", - deyə nazir bildirib.
Oana-Silviya Tsoyu vurğulayıb ki, Rumıniya tərəfi Rusiya Federasiyasını məsuliyyətsiz davranışının ölkələr arasındakı diplomatik münasibətlərə və sanksiyalar paketinə dair Avropa səviyyəsində atılacaq addımlarla bağlı məlumatlandırmaq niyyətindədir.
Rumıniyanın müdafiə naziri səlahiyyətlərinin icraçısı Radu Mirutse bəyan edib ki, qırıcı təyyarələr havaya qaldırılıb və onların atəş açmaq icazəsi olub. Lakin PUA vurulmayıb, çünki onun ələ keçirilməsi Qalats bələdiyyəsinə çox ziyan vura bilərdi.
O əlavə edib ki, dron Rumıniya hava məkanında dörd dəqiqə qalıb. Radu Mirutse həmçinin hökuməti və NATO müttəfiqlərini hadisə ilə bağlı məlumatlandırdığını bildirib. O, NATO-nun Baş katibi Mark Rütte ilə telefon danışığı apardığını da qeyd edib. Şimali Atlantika Alyansının nümayəndəsi öz növbəsində bəyan edib ki, Rütte Rumıniya hakimiyyəti ilə əlaqə saxlayıb.
Qeyd edək ki, 29 may gecəsi Qalats şəhərindəki binalardan birinin damına PUA düşüb və nəticədə yanğın baş verib. Hakimiyyət orqanları bir neçə nəfərin xəsarət aldığını və təxminən 70 insanın təxliyə edildiyini bildirib. Rumıniya prokurorluğu hadisə ilə bağlı cinayət işi açıb.
Rumıniyanın şərqindəki Qalats şəhərində pilotsuz uçuş aparatı (PUA) yaşayış binasına çırpılıb.
Oxu.Az bu barədə "Mediafax" agentliyinə istinadən xəbər verir.
Bina ilə toqquşma zamanı partlayış baş verib, bundan sonra mənzillərin birində yanğın başlayıb, nəticədə iki nəfər xəsarət alıb. Sonradan yanğını söndürmək mümkün olub.
Qeyd olunur ki, binadan təxminən 70 sakin təxliyə edilib.
Əvvəllər "Reuters" agentliyi xəbər vermişdi ki, Rumıniyanın şimal-qərbində partlayıcı yük daşımayan başqa bir pilotsuz uçuş aparatı da aşkar edilib.
